Orgelklubben er for orgelinteresserte barn og ungdommar i Møre&Romsdal. Leiar er Rose Iren Stave, kantor i Sykkylven, og Kasserar/sekretær er Gunnar Inge Eide, kantor i Geiranger/Hellesylt.
Spelar du orgel eller piano? Eller har du lyst å prøve?
Orgelklubben i Møre arrangerer helgesamlingar der born og unge får lære om kyrkjeorgel og få spele på dette spennande, store instrumentet.
Samlingane våre i 2022: 18.-20.mars var det orgelklubbsamling i Sykkylven med overnatting i kyrkja og deltaking i gudstenesta søndagen. 20.-22.mai hadde vi samling i Molde domkyrkje med besøk av komponist Robert Coates. Han har skrive tre Folketonesuiter til Orgelklubben i Møre, og var god instruktør på samlinga. Alle dei 8 deltakarane spelte under gudstenesta i domkyrkja søndag!
Neste samling: 12.-13.november: ORGELSAFARI i Ålesund-regionen! Vi startar i Ørskog kyrkje laurdag kl.10, køyrer vidare til Skodje kyrkje, derifrå til sjølvaste Ålesund kyrkje og Norge sitt nest største orgel! Vidare køyrer vi til Borgund kyrkje, før vi endar i Volsdalen kyrkje, der dei som vil kan overnatte i kjellaren. Innimellom all orgelspelinga, et vi ilag og blir bedre kjent. Søndag blir nokre av oss med og spelar i til familiegudstenesta i Borgund kyrkje kl.11.
Til våren skal vi på tur til Trondheim og besøke Nidarosdomen og orgelklubben der. Kanskje finn vi tid til ei samling i Norddal tidlegare på hausten.
Nokre av orgelklubbmedlemmane våre er med i You Tube - videoane "Se Skogen" av Nils Henrik Asheim.
Orgelinteresserte er hjarteleg velkomne til å ta kontakt med kantor i Sykkylven, Rose Iren Stave, tlf 91510045 / Mail: kantor@sykkylven.kyrkja.no
Sykkylvingar kan også kontakte kulturskulerektor Åge Frøystad eller kantor Nikolas Fehr i kulturskulen.
Nye orgelinteresserte born og ungdommar er alltid velkomne til orgelklubben! Alder: ca.5.klasse og oppover.
Hausten 2019 var Orgelklubben på tur til Oslo. Vi fekk bu i Nordstrand kyrkjelydshus, og prøvde det nye orgelet i Nordstrand kyrkje. I Oslo Domkyrkje var vi på orgelkonsert, og domkantor Kåre Nordstoga let oss prøve det store orgelet i domkyrkja etter konserten. I Uranienborg kyrkje sat vi på galleriet ved sida av orgelet under gudstenesta, og vi fekk prøve orgelet etterpå. Kantor Inger Lise Ulsrud viste oss opp i klokketårnet etterpå, og klokkenisten lærte oss om det store klokkespelet. Deretter viste professor Inger Lise Ulsrud oss rundt på Norges Musikkhøgskole, der vi også fekk prøve mange orgel.
LES MEIR OM OSLOTUREN
--------
Artikkel i tidsskriftet Norsk kirkemusikk 2018:
Tekst: Rose Iren Stave
Foto: Jorun Kvalsund Jarnes
